محكمة جنح مستأنف ألغت قرار إيداع الأطفال التلاتة المتهمين بسرقة الخبز الإصلاحية وقررت تسليم الأطفال لذويهم وأكيد جزء كبير من أسباب الحكم ده الحملة اللي اتعملت علي الموضوع ده من امبارح
- الواقعة حصلت من سنتين بالتمام والكمال. سنتين الشرطة والنيابة والقضاء مشغولين بقضية سرقة 3 أطفال جعانين كام رغيف عيش عشان كانوا شاريين جبنة ومش لاقيين عيش يغمسوا بيه وماشاء الله لقيوا فيها أدلة وسمعوا شهود وقرروا حبس العيال وموقعتش القضية بالتقادم ولا الأدلة اتفرمت وضاعت
- القضية متهم فيها 3 أطفال اتنين مسلمين وواحد مسيحي وكلهم أصدقاء في المدرسة والفقر، عبد المسيح مثلا والده "عربجي كارو" عنده 4 أولاد وزوجته مش بتشتغل وميفيش أي مصدر رزق للأسرة غير عربية كارو وحمار، والدرس المستفاد من ده إننا كلنا في الهم سوا لا المسيحي مرتاح وبياخد فلوس من الكنيسة ولا المسلم مستفيد من كونه أغلبية
- الموضوع غالبا كان انهم عاوزين يخلوا العيال دي كبش فدا، لأن أهالي القرية كانوا قدموا شكوى جماعية بإن المخبز بياخد فلوس من فترة ومش بيجيب لهم عيش، وبمجرد ما شافوا العيال بياخدوا كيس عيش من علي الحيطة الراجل صاحب المخبز حب يداري علي الموضوع وقال بس هم دول بقي اللي بيسرقوا العيش من القرية كلها.
- أخيرا خدوا بالكم من القصص الكتير اللي بتتنشر كل يوم بالشكل ده. أو ما تحس بواقعة فيها ظلم اعمل شير وكبر الموضوع علي قد ما تقدر، لأننا مفيش في ايدنا غير ده ولأن سلاح الشير ده أثبت فعالية ولأن الغلبان في البلد دي لما الكبار بيستفردوا بيه بينهشوا لحمه ويقرقشوا عضمه ويشيلوه شيلة ميشوفش بيها النور تاني
lمنقول من صفحة تامر أبوعرب فيسبوك
ليست هناك تعليقات:
إرسال تعليق